‘Rwy’n gyndyn iawn i ddefnyddio’r gair athrylith ond rwy’n siŵr fod peth o’r gynneddf anniffiniol honno yn yr ysgrifennwr hwn.’ Dyna eiriau Islwyn Ffowc Elis wrth ddyfarnu’r Fedal Ryddiaith yn Eisteddfod Genedlaethol Llangefni yn 1983 gan ychwanegu mai hon oedd y gystadleuaeth ‘orau y bûm i’n ei beirniadu yn yr Eisteddfod Genedlaethol’. Wrth dafoli’r un ymgeisydd dywedodd Branwen Jarvis, ‘Wrth ddarllen ambell baragraff, bron na theimlir bod Ellis Wynne ei hun yn cerdded ein daear ni drachefn.’ Dweud go fawr. Ychwanegwch sylwadau Saunders Lewis ugain mlynedd ynghynt mewn broliant i ail nofel yr awdur: ‘Dyma, o wlad Daniel Owen, nofelydd sy’n olynydd teilwng iddo, nofelydd y mae addewid mawredd ynddo.’
Yr awdur dan sylw oedd Tudor Wilson Evans a’i gyfrol fuddugol oedd y nofel fer Y Pabi Coch.