Mae GwyrddNi yn fudiad gweithredu ar newid hinsawdd sydd wedi ei leoli yn y gymuned ac yn cael ei arwain gan y gymuned. Mae’n dod â phobl ynghyd mewn pum ardal yng Ngwynedd i drafod, dysgu a gweithredu yn lleol ar newid hinsawdd.
Mae GwyrddNi yn cael ei ariannu gan Gronfa Gweithredu Hinsawdd y Loteri Genedlaethol, ac yn gweithredu mewn partneriaeth â chwech sefydliad cymunedol arall; Partneriaeth Ogwen yn Nyffryn Ogwen, Cyd Ynni yn Nyffryn Peris, Yr Orsaf yn Nyffryn Nantlle, Cwmni Bro ym Mro Ffestiniog, Plas Glyn-y-Weddw ym Mhen Llŷn a DEG sydd wedi eu sefydlu yng Nghaernarfon.
Yn ystod 2022-2023 cafon Gynulliadau Cymunedol ar yr Hinsawdd yn y bum ardal. Roedd y Cynulliadau yn gyfle i bobl ddod at ei gilydd i drafod, gwrando, rhannu, siarad, dysgu a phenderfynu efo’i gilydd beth roeddyn nhw – fel cymuned – isio’i wneud yn lleol i daclo newid hinsawdd. Rŵan, mae tîm GwyrddNi yn cefnogi grwpiau cymunedol i wiredu eu syniadau – o dyfu bwyd i gynhyrchu ynni, o drafnidiaeth werdd i gaffis trwsio – a llawer mwy!
Ewch i’n gwefan neu gysylltwch hefo ni.
